Seniorinnen 2023-08-15 Turnfahrt

Bim Bahnhof Seen schtönd mir parat,
denn hüt gahts wiedär uf eusi Turnerfahrt.
Mit Zug, Bus und Schiff gönd mir uf d'Reis,
hoffätlich wird’s nöd wieder so verruckt heiss!

Z'Dürnten uf em Wäg is Klangmuseum hämär denn scho s'erscht Mal müässä schwitze,
däfür hämär dänn det für Kaffi und Gipfeli grad därfä anesitzä.

Uf dä Füährig hämär vieli schöni antiki Sachä gseh,
chum z'glaubä, dass äs das früähnär scho hät gäh.
Tanz-, Chilbi- und Salonorglä mit ihräm tollä Klang sind ertönt,
so grossi Orglä mit Papierwalzä hemer vorhär no niä ghört.
Antiki Gramophone zum Akurblä sind da gsi,
au äs Dictaphone vo 1927 isch däbi.

Au ä Flötä-, Kuehschwanz-, Schwarzwälder- und Standuhr hämär gseh,
aber es hät au namal öbis meh:
Uf äm Chinderkarusell hämär d'Rundänä gnossä,
d'Zyt isch wie im Flug verflossä.
Wie früänär uf dä Chilbi hämär träumt,
mir wettäd nöd, hettäd mir das versäumt!

Nach ämä feinä Mittagässä simär denn ufbrochä,
und wiedär ad Busstation abä gloffä.
S'Päuli hät über diä Hitz keis Wort verlorä,
hätt sie doch hüt ämal nöd gschlottärät und gfrorä!

Z'Rapperswil hät d'Marlies gmeint,
ich han 1. Klass än Tisch für euis reserviert,
dass mir nöd müänd kämpfä um äs Plätzli,
d'Marlies isch halt scho äs Schätzli!
I aller Ruäh händ mir dänn dä Dessert chönnä ässä,
sind alli amänä langä Tisch zämä gsässä.

Z'Erlenbach händ mir dänn wellä dä Zug näh,
än chlienä Zwüschäfall hätts abär gäh:
Mir händ gluägt, wiä dä jungi Zürisee-Matros
diä Tau gschickt um diä Pföschtä schwingt,
ich ha no dänkt, dä meint jetzt abär nöd,
dass jedi vo euis ohni Schteg as Ufär springt?
Z'schpat simär dänn vorn zum Usstieg cho,
das dummi Schiff fahrt scho wieder dävo!

Bis zum Bürkliplatz simär halt bliebä sitzä,
dänn hämär namal müässä schwitzä.
Z'Fuess ischs zum Bahnhof Stadelhofä gangä,
uf dä Zug häts euis dänn abär glangät!

Bald simär z'Winterthur acho,
und händ dä Bus uf Seen is Burehus na gnoh.
So än schönä Tag wiä hüt möchtäd mir na mängmal dörfä erläbä,
viel Freud ha, chönä schwätzä und Gmeinschaft pflägä.

Dä Marlies dankäd mir no für alläs jetzt am Schluss,
mir alli probieräd z'bliebe guät im Schuss,
dass mir au wiedär äs Reisli chönd machä im nächschtä Jahr,
sichär wiedär im Zug odär au mit äm Car.

Ursula Baumberger