DTV Seen - Ehrenmitglied Gabi Bienz

DTV ALL BLD 2020 09 25 Gabi BienzSi isch waarlich ä härzensgueti Frau mit äre grosse Energii.
Bi de Turnfahrt wanderet si meistens vorne mit und gibt gern s Tempo a.
Au im Bruef spiilt si i de erste Liga mit und luegt nach em Rechtä.

Eloquänt bewegt si sich uf em politische Parkett, will d’Menschä ire am Härze liget.
Sit äs paar Jaar hät si zudem ir musisches Talent entdeckt.

Mit irem Maa und de zwei Söön wohnt si scho lang in Seen.
Familiä, Bruef, Politik, Chor, Chille, Turnverein und viiles mee bringt si under ein Huet und
findet trotzdem Ziit, mit äm Chrampfer-T-Shirt än Isatz zleistä.
Ich frög mich, woher si d Energie nimmt.
Bestimmt am Dunschtigabig i de Fraueriige 1 mit Fit und Fun und coole Tänz.

Aber jetzt no de Reihä na: Vor 24 Jahr am 28. November 1996
isch si i d Fraueriige 1 itretä und wird a de folgende GV offiziell in Verein ufgnoo.
Trotz irne viilne Verpflichtigä entscheidet si sich im Jaar 2000 fürs Amt als Aktuarin.
So ä versierti Kandidatin nimmt dä Vorstand gern uf.

Im Jahr 2020 isch si immer no verantwortlich fürs Amt als Aktuarin.
Das sind 20 Jaar ooni Unterbruch! Dank irem juristische Wüsse hät si
massgeblich a de Statuteänderige im 2004 und im 2009 mitgschafft,
dafür sind mir ire sehr dankbar. Zudem danket mir dir, liäbi Gabi Bienz,
für diä akurat verfasste Protokoll und s Fachwüsse, wo du in Vorstand iäbringsch.

Für dä Vorstand isch klar: Gabi Bienz isch oises neui Ehrenmitglied. Herzlichi Gratulation.

Winterthur, 25. September 2020 – Ruth Meyer