DTV Seen  2019-03-29  Ehrenmitglied Gabi Koblet

„Freude an der Arbeit lässt das Werk trefflich geraten.“   Aristoteles

dtv all bld 2019 03 29 gabi KobletDe Reihe na – 1973 als 20-Jährigi neu in DTV Seä cho
hät si 2 Jahr druf scho e Maitliriege überno
wüchentli di Chliine fördere – au günne a de Turntäg
5 Jahr lang – dänn rüeft en ganz neue Wäg

Hochziite, Muetter werde und mit em Ma zäme
sich hinder de Ufbau vo de eigene Firma chlämme
afänglich nüt mit Computer – Bürohandwerk am Abig
Familiä, Hushalt, Chunde – so langi Täg sind happig

Nach em zweite Chind – mit de Firma zum gröbste us
bliibt für öppis neus scho wieder gnueg Pfus
1989 söll's mit em Vereinsheft Seemer Turne losgah
sämtlichi Mitglieder werdet das im Briefchaschte ha

Zueständig do na allei für de ganzi Versand
heisst hunderti Adrässe chläbe – einzel vo Hand
für d'Poscht sortiere, bündle, abrächne – bis hüt
scho 95 Usgabe – oder bereits 30 Jahr – liebi Lüüt !

Na nid gnueg – churz vor em Millennium isch de Verein i de Chrott
d'Tombola ! - e Büez wo au nid grad jede wott
si packt's a ohni Bammel vor em riise Ufwand
über es Jahrzähnt liit d'Verantwortig i ihrere Hand

Hüfewiis Bättelbrief tippe und Lischte erstelle
sich bi tuusige Losrölleli nu ja nid verzäle
tagelang Gabe sammle – wiitume – wie besässe
im Sponsoredank um Himmelswille keine vergässe

D'Sache Sächeli hüfthöch i me Zimmer deponiere
für de Friitig und Samstig schön usgwoge halbiere
z'letscht Nümmerli druf und alls is Chilegmeindhus fuege
e tolli Tombolapyramide isch für Gäscht es herrlichs Luege

Eismal Tombolapriis ghüetet im Hus däheim
isch es hüt s'ganz Fäschtinventar vom Verein
nüt gaht vom Lager am Roggewäg zum Hus us
und ohä – s'chunt nid suber gordnet zrugg in Fundus

I de Materialboxe sind die rote Chrampfer-T-Shirt däbi
und a jedem, würkli jedem Fäscht isch eis für si
au am Hölderli-OL isch ihri Mithilf en wahre Säge
zwar mues me deet kei so es rot's Liibli träge

Vereinsinventar, OL, Tombola, Vereinsheft, Maitliriege
däzue scho 45 Jahr am Dunnstig aktiv bliibe
sit längerem rebelliered aber leider d'Chnü bi de Gymnastik
chli schoone – warte mit neue Scharnier us Metall und Plastik

Es Goldchlümpli – wo so vil Freiziit in Verein investiert
es dick's Lob und tuusig Dank sind ächt verdient
en fixe Batze däfür isch i de Statute nid vorgseh
öppis wertvolls – öppis für immer söt's doch gäh

Es git nur eis – da hät de Vorstand nid lang knoblet
Ehremitglied söll si hüt werde – d'Gabi Koblet
Gälled liebi Fraue und Gäscht – s'isch höchsti Ziit
zur Standing Ovation für euses neui Ehremitglied !

8405 Winterthur-Seen, 29.03.2019 – für de Vorstand – Uschi Boo